Act 14 | GAM | STEP | Kune ge Pol ne Barnabas dumo Aikoniam po, soka ye wanpill mal pille, Juda una lotune numb yei al po kandja dje una aupill. Kandja djipill ge wopake paika, una merke Juda una ne, Grik una boll aike pillgi dji.

Acts 14

Pol ne Barnabas dumo Aikoniam po kandja dje una aupill

1 Kune ge Pol ne Barnabas dumo Aikoniam po, soka ye wanpill mal pille, Juda una lotune numb yei al po kandja dje una aupill. Kandja djipill ge wopake paika, una merke Juda una ne, Grik una boll aike pillgi dji. 2 Dji ba Juda una, pillgi nadjimbon we dji una, ga po epil djell una kamalne tomaka, ga pillgi dji una moi al ke pille awi. 3 Soka Aikoniam ege momo mopill. Iwa Kerman nono wandill golo awi mal ge, dje una aupill, kand nagopill. Alla Iwa Kerman yeika soka kogo ta mal ye, wal kayekaye ye mopill. Mopill al ge, une ombine dje awi, soka kandja djinmell ge kaima djinmell we dji. 4 Ba Aikoniam una porapora nomane taimane napai. Pende Juda una moi al po kolmaka, pende aposel mopill al kolmaka embe yei. 5 Embe yemaka, epil djell una ne, Juda una ne, Juda una kerman ge kandja beglo embe dji, nono aposel soka ye ke ye awo, ku to gopon we dji. 6 Dji ba soka pille seke er pupill. Distrik Likonia paknato dumo soka Listra ne Derbe po kandja dje una awo, dumo kerker manda manda yei al po 7 Jisas kandjiyembe wopake dje orko woro wanpill.

Barnabas ne Sol dumo Listra ne Derbe po kogo yepill

8 Dumo Listra ge iwa ta moi. Yene kake ke yei. Une me kui kune une kake ke embe yei, kond kabiya napai. 9 Pol kandja dje moika iwa ge pille moika, Pol kani, iwa ge pillgi pai, kake kiwa yenda mal pai. 10 Pol yau to embe dji, ni agle! dji. Djika iwa ge ola dje aglo kond kambi. 11 Pol embe yeika una Laikonia kane, yenekne kandjine pall yau to embe dji, god kambono mor ge er wo una mal embe kulo po, nono mormon al wopill mormell! we dji. 12 Yenekne god ta kandjiye Sus we dji ge kambono Barnabas ge Sus moro we dji. Pol kandja dji una moi pille, ga god ta kandjiye Ermes ge kambono Pol ge Ermes moro we dji. 13 Dumo ge gull djillake orko to, una god Sus lotu numb ta take wori yei. Gull pai al ge una merke yemaka, god Sus opa gale awi iwa ge yeika, ga wo Pol ne Barnabas god mal embe mormell dje kane, nono opa gale iwo soka aumbon we dji. Kambono po kog kau iwamba pende i, plawa wopake i ull woro, gull djillake yei al iwi.

14 Iwo opa ye aumbon dje yei ba, Barnabas ne Sol kane man djipill. Yenekne konkunom amblo ball dje woro, una merke moi al soka bull dje pakna po yau to embe djipill, 15 kambono ye mor ge! Namba yei pille ye embe yenj ne? Ye una mor mal embe, no mormoll. Alla, no wo kandja wopake dje ye awo embe djipill, ye god kende pillgi djinj ge kerme! God gun moro una ge une kupill makimb, nu solwara ne, wal porapora moro ge une beki, ye une boll pillgi djine we djipill. 16 Kamasa God kandja ta nadji, epil djell una porapora yenekne nomane pai mal wani. 17 Ba une gulo namoi, man. Una kane ine mal moi. Ege ege une ye wopake ye awo worika, kam toika, kwa wopake boika, ye noi kumbo yeika, ye tukne arngan yei we djipill. 18 Soka kandja embe djipillka, kambono opa gale aumbon dje yembe yei, nakerne mal pai ba, soka yembe yepill, opa gale nawi.

19 Are Juda una pende Antiok ne, Aikoniam kere er dumo Listra woi. Wo kandja ke mal djimaka, una merke ellne kumbsika, wo Pol ku tomaka, bolo yage pai. Une kaima goro dje pille, ngujo ipo dumo kerman gull pai al iwo orkoto wormaka, pai. 20 Ba Jisas pillgi dji una wo une pai al, gull bolo i pakna wormaka, Pol alla aglo er yem dumo kerman yei al pakna pi. Po pai, tagika, une Barnabas boll er dumo Derbe pupill.

Pol ne Barnabas po Jisas pillgi dji una moi al kandja wopake dje aupill

21 Soka dumo Derbe po Jisas kandjiyembe wopake dje awo wanpillka, una merke pille er pakna wo Jisas kogoye una moi. Molmaka, soka er yem dumo Listra po, Aikoniam po Antiok po embe ye wanpill. 22 Jisas kogoye una nomane dongall pandaka, pillgi dje pa moye dje embe djipill, God dumoye kantau yendo al er pakna bon ge, nono imb kake er pakna bon we djipill. 23 Lotu numb porapora wanpill al, Pol ne Barnabas po una kantau yene una dje worpillka moi. Molmaka God kogoye yene dje pille, kwa nano, kamang embe yepill, Iwa Kerman, ye pillgi dji una mor ge, ye une agle al moye we djipill.

Barnabas ne Sol er yem dumo Antiok pupill

24 Are soka er distrik Pisidia pakna po wane molo kere, er propins Pampilia pupill. 25 Po molo dumo Perga po God kandjiye dje una aupill. Awo kere, er dumo Atalia po mopill. 26 Sip ta wo paika, soka er pakna po Antiok pupill. Antiok yei ge, asa pillgi dji una wo soka po kogo yembell dje pille kamang embe yei, God ye wandill golo aundaka, kogo ye mopell we dji. Dji mal kogo ge soka yepill pora dji. 27 Wo pillau dje molo djipillka, pillgi dji una wo makai toi. Molmaka, God iwa soka boll po kogo yei mal ge, soka wal porapora kandjambe to embe djipill, God kond ta ombine dje awi, epil djell una Jisas boll pillgi dji we djipill. 28 Soka Antiok ege momo Jisas kogoye una boll aike molo papill.